Қазақстан Республикасының Ғылым және жоғары білім министрі Саясат Нұрбек Caspian University-ді QS Asia University Rankings 2026 халықаралық рейтингіндегі сәтті дебютімен шын жүректен құттықтады.
Өз құттықтау сөзінде Министр Caspian University аталған беделді рейтингке енуі тек университет ұжымы үшін ғана емес, сонымен қатар жалпы Қазақстанның жоғары білім беру жүйесі үшін маңызды жетістік екенін атап өтті. Бұл қазақстандық жоғары оқу орындарының академиялық әлеуетінің артып келе жатқанын және олардың халықаралық деңгейдегі бәсекеге қабілеттілігінің мойындалғанын білдіреді.
«Caspian University QS Asia рейтингіне енуі – стратегиялық дамудың, білім беру бағдарламалары сапасының және енгізіліп жатқан бастамалардың тиімділігінің айқын көрсеткіші. Университетке алдағы уақытта да табыс, халықаралық ынтымақтастықтың кеңеюін және жаңа жеңістер тілеймін», – деп атап өтті Саясат Нұрбек.
Жетістіктің маңызы
Caspian University университетінің Азияның үздік университеттері қатарына енуі – білім беру стандарттарының жоғары деңгейін, ғылыми әлеуетін, академиялық беделін және университеттің тұрақты даму қағидаттарын айқын көрсетеді.
Бұл жетістік Caspian University университетінің халықаралық мәртебесін күшейтіп, жаһандық серіктестіктерді дамытуға, академиялық ұтқырлықты кеңейтуге, талантты студенттер мен профессорлық-оқытушылық құрамды тартуға жаңа мүмкіндіктер ашады.
Стратегиялық қадам алға
Caspian University халықаралық интеграцияға, ғылыми зерттеулерді дамытуға және білім беру саласындағы ұлттық басымдықтарды іске асыруға басымдық беруді жалғастыруда. QS Asia 2026 рейтингіне ену – университеттің бүкіл ұжымы, академиялық қауымдастық және басқарушы командасының жүйелі еңбегінің нәтижесі.
